Galiza e Espanha: umha imensa prisom

O autor, Carlos Velasco, a partir de reflexións de expresos, reflexiona sobre o terrible destino que lles esperaba ós que estiveran detidos e saían en “libertade”.

Cumprida a condena mais ou menos longa, produzia-se a excarceraçom e o preso, ou presa, tornava à vida civil. Reencontrava-se daquela com os familiares e amigos sobreviventes, com o bairro, aldeia ou vila de nascença ou de adopçom, mas nom com a liberdade. De maneira nengumha com a liberdade. Porque estar libre, ou seja nom encarcerado, na Galiza ou na Espanha de Franco era “apresentar-se à Guardia Civil regularmente, ou ires a casa, e um ano despois, ou mais, ou menos, seres chamado a filas para fazer a mili de Franco, passando primeiro pola Caixa de Recrutamento, logo a um Batalhom Disciplinário de Soldados Trabalhadores Penados, como mínimo o tempo normal da quinta”; como também ver-se despedido do trabalho, ou inabilitado para exercer a profissom e confinado nas lindes de um determinado município durante anos e anos; atopar-se com os vizinhos de toda a vida aferrolhados pola fame, o terror e mais o silêncio; com o entorno que dera sentido ao próprio existir social e laboral desprovido dos vínculos comunitário-afectivos de outrora, quebrados implacavelmente pola repressom; era, enfim, ser inscrito sem mais requilórios como CAR (católico apostólico romano) em diversas instâncias oficiais, nomeadamente as militares; precisar, para poder circular polo território nacional, de um salvoconduto policial canda a correspondente certificaçom parroquial de ter cumprido o preceito pascual… e assim por diante.

Nom surpreende, já que logo, a decepçom e o desânimo que, mesmo umha personalidade tam reja como a da Isabel Rios, se vê abocada a experimentar no momento da sua excarceraçom: “Cando saio em liberdade o silêncio de Espanha impressiona-me fondamente. Ninguém di umha palavra sobre tanto crime e tanta dor. É como se realmente nom tivessem transcorrido quarenta anos de terror, ou como se tivéssemos estado mergulhados num sopor e perdido a memória”. É a mesma impressom deprimente que encontra Garcia Durám na sua tomada de contacto com a realidade de extra-muros: “Ao dia seguinte viñeron os meus pais. ¡Que vellos estaban! Coca xa tiña máis cabelo branco que negro; e papá estaba moi delgado. Despois de abrazarnos sentamos, e Coca, enxugando as bágoas e sen deixar de mirarme, dicíame: ´¡Que cambiado estás! Ata a túa voz soa diferente. Falas… non sei como. ¿Pasaches moita fame? ¿Sufriches moito? Pobre filliño, e eu sen poder valerte’ O meu pai gardaba silencio e mirábame. E os seus ollos, cun brillo esmorecido, impresionábanme, dábanme pena. Sei o que pensaba: todo estaba perdido. Eu non podía volver á casa. O taller, embargado. Sen medios e tendo que traballar moi duro para mal comer. A miña nai mirounos aos dous”.

Até umha persoa de posiçom social abastada e, portanto, em situaçom bem menos angustiosa —mália que nom isenta de perigo — como Ana Mª Alvajar, na altura apenas umha adolescente afastada dos seus pais exiliados, tem deixado testemunho nas suas memórias de aquele ambiente de terror, miséria material e moral e mediocridade intelectual, mistura de quartel e sancristia, em que se convertera a vida cotiá da mam dos artífices da Victoria.

E é que, como tem assinalado Nicolás Sánchez Albornoz , “em matéria de liberdade, o cárcere e a rua diferenciavam-se só num grau. Espanha inteira —deve-se recordar — era daquela umha imensa prisom”[1].

                                                                       Carlos Velasco Souto
[1] Os testemunhos de Isabel Ríos e Juan Garcia Durám podem consultar-se nos seus respectivos relatos autobiográficos, Testimonio de la Guerra Civil. E Pola Liberdade. A loita antifranquista de Luís costa. Vigo, A Nosa Terra, 2001, pp. 92-93. Igualmente o da Ana Mª Alvajar: Soltando lastre. Memorias. O comentário de Sánchez Albornoz filho, em “Cuelgamuros: presos políticos para un mausoleo”, incluído no volume colectivo editado por C. Molinero, M. Sala, e J. Sobrequés: Una inmensa prisión. Los campos de concentración y las prisiones durante la guerra civil y el franquismo.

Deixar unha resposta

Please log in using one of these methods to post your comment:

Logotipo de WordPress.com

Estás a comentar desde a túa conta de WordPress.com. Sair /  Cambiar )

Google photo

Estás a comentar desde a túa conta de Google. Sair /  Cambiar )

Twitter picture

Estás a comentar desde a túa conta de Twitter. Sair /  Cambiar )

Facebook photo

Estás a comentar desde a túa conta de Facebook. Sair /  Cambiar )

Conectando a %s